Ұйым қызметін сапалы жаңа деңгейге көтерудің кезек күттірмес міндеттері айқындалды

Сәрсенбі күні «Ардагерлер ұйымы» республикалық қоғамдық бірлестігі орталық кеңесі төралқасының кеңейтілген отырысы өтті. Онлайн режимде болған бұл алқалы жиынға Жамбыл облыстық ардагерлер кеңесінің төрағасы Еркінбек Солтыбаев  бастаған төралқа мүшелері, Тараз қалалық және Жамбыл аудандық ардагердлер кеңестерінің төрағалары Күләш Әбдікешова, Бақыт Сырлыбаев және басқалар қатысты.  
 «Ардагерлер ұйымы» республикалық қоғамдық бірлестігі  орталық кеңесінің төрағасы Әбілғазы Құсайынов төралқа отырысын қысқаша сөз сөйлеп ашып, жиналғандарды жиынның күн тәртібімен таныстырды. 
Отырыста республика ардагерлер ұйымының ХІ съезінде қабылданған шешімдерге сәйкес, Мемлекет басшысы Қасым-Жомарт Тоқаевтың «Әділетті Қазақстан» және «Адал азамат» реформаларын жүзеге асыру бағытындағы «Ұрпақтар сабақтастығы және ұлттық құндылықтар» жобасының 7 бағытты қамтитын бағдарламасы бекітілді. Осы мәселе бойынша орталық кеңесі төрағасының орынбасары Самат Мурзатаев баяндама жасады. 
Бағдарламада қазіргі қоғамның өзекті мәселелері қамтылған. Сондай-ақ  жобаны іске асыру тетіктері талқыланып, оны жаңа цифрлық деңгейге көтеру мақсатында белгілі сарапшылар Есенғазы Иманғалиев пен Екатерина Смышляеваның ұсыныстары ескеріліп, енгізілді. 
«Ардагерлер ұйымы» республикалық қоғамдық бірлестігінің құрылғанына 40 жыл толатын айтулы мерейтойын атап өтуге арналған арнайы іс-шаралар жоспары талқыланып қабылданды. Бұл жөнінде  төрағаның бірінші орынбасары Абай Тасбулатов баяндады.
Төралқа отырысында  алда болатын  1 қазан – Халықаралық қарттар күнін жоғары деңгейде атап өту мақсатында арнайы іс-шаралар жоспары бекітілді. 
Бұдан өзге, төралқа отырысында орталық кеңес жанындағы тұрақты комиссиялардың атаулары бүгінгі қоғам талаптары мен ұйым алдында тұрған міндеттерге сайкес нақтыланды.
Алдағы жұмыстардың тиімділігін арттыру мақсатында орталық кеңес төрағасының жанынан штаттан тыс қоғамдық кеңесшілер институтын құру туралы қаулы қабылданды. 
Жиын аяқталғаннан кейін облыстық ардагерлер кеңесінің төрағасы Е.Солтыбаев орталық кеңестің төралқа отырысында қабылданған «Ұрпақтар сабақтастығы және ұлттық құндылықтар» жобасының 7 басым бағытын облыс ардагерлер ұйымдарында жүзеге асырудың,  ұйым қызметін сапалы жаңа деңгейге көтерудің кезек күттірмес міндеттеріне тоқталды. 

"Ғұмыр-Дария"–Ақпарат