ҰСТАЗ ЕСІМІ ҰЛЫҚТАЛДЫ

Кеңес Одағының Батыры Сәду Шәкіров атындағы орта мектепте аудандық ардагерлер кеңесінің ұйымдастыруымен Ұлы Жеңістің 80 жылдығына орай және Ұлы Отан соғысының ардагері, Еңбек Қызыл Ту орденінің иегері, Шу мектеп интернатының үздіксіз 20 жыл директоры болған Қазақ КСР Халық ағарту ісінің үздік қызметкері, ұстаздардың ұстазы болған Нәмет Базыловтың туғанына 100 жыл толуына арналған салтанатты кеш өтті. Кездесуге С. Шәкіров атындағы мектептің  ардагер ұстаздары, 1959-1979 жылдары мектеп интернатта оқыған түлектер, Астана, Алматы, Қостанай, Тараз қалаларынан, Меркі, Мойынқұм, Қордай аудандарынан, Шу қаласы мен Шу ауданының ауылдарынан келген қонақтар  қатысты. Майдангер ардагер және ұлағатты ұстаз болған Нәмет Базылов туралы қызықты естеліктер айтылды. Ол кісінің 1942 жылы соғысқа алынғаны және жаналыс-жанберіс қиян-кескі соғыс жүріп жатқан Сталинград майданында жасаған ерліктері еске алынды. 1950 жылы елге оралғаннан кейін Ворошилов атындағы орталау мектепте еңбек жолын бастаған ол біраз жыл партия органдарында қызмет етеді. 1957 жылы Абай атындағы Қазақ педагогикалық институтын сырттай оқып бітіріп, ұстаздыққа бір жолата ден қояды. 1959 жылдан 1979 жылға дейін үздіксіз Шу ауданының орталығы-Төле би ауылындағы мектеп интернатта директор болып жемісті қызмет етеді. Малшы балаларына әкесінің орнына әке бола алады, тәртіпке шақыратын жерде қаталдықта танытты, мейрімін төгіп балалардың маңдайынан сипай да біледі.
Кездесуге жиналғандар ерлігі елге мұра болып, ұстаздығы ұрпағына шапағат сыйлаған Нәмет Базылов ағайды осылайша тебірене еске алды.
Дәнен бейсенбаева,
Шу аудандық ардагерлер кеңесінің
 төралқа мүшесі