Тұғырынан таймаған хас таланттар

Биыл Ұлы Жеңістің 80 жылдығына арналып сәуір айының өне бойында аудандарда және облыста ардагер өнерпаздардың аудандық, облыстық деңгейдегі байқаулары өтеді. Ардагер өнерпаздардың аудандық деңгейдегі бәсекесі 1-10 сәуір аралығында, ал облыстық байқау Тараз қаласындағы Баласағұн концерт залында 15 сәуірде ұйымдастырылады. 
Ардагерлер арасында халық шығармашылығын жандандыру, аға буын өкілдерінің асыл қасиеттерін, тәлім-тағылымын жастардың бойына сіңіру, ардагерлер шығармашылығына қолдау көрсету, Ұлы Отан соғысы жылдарында жасалған жаппай ерлікті әскери әндер, басқа да өнер жанрлары арқылы насихаттау, тәуелсіз еліміз және туған жеріміз туралы ұлттық рухты көтеретін патриоттық әндерді халық арасында кеңінен тарату мақсатында ұйымдастырылып жатқан өнер бәсекесі өткен сәрсенбіде Тараз қаласындағы Ықылас Дүкенұлы атындағы мәдениет үйінде бастау алды. 
Бұл жолы сахнаға Тараз қаласының ардагер ақсақалдары мен ақ жаулықты әже-апалары көтеріліп, өздерінің бойына сіңген таланттарын қала тұрғындары мен қонақтарының алдында паш етті. 
Ұлы мерекеге арналған ауқымды өнер шарасына облыстық ардагерлер кеңесінің мүшелері, Тараз қаласының басшылары, қала әкімдігі бөлімдерінің жауапты қызметкерлері, барлық аудандардан келген ардагерлер кеңестерінің төрағалары қатысты. Концертке келген қонақтарды "Әулиеата", "Асыл аналар", "Марычка", "Калинка" ардагерлер ансамбльдері және әскери оркестр патриоттық әндерді шырқап қарсы алды. 
Облыстық ардагерлер кеңесінің төрағасы Еркінбек Солтыбаев, Тараз қаласы әкімінің орынбасары Гүлдана Жауынбекова, Тараз қалалық мәслихатының төрағасы Кенжебек Олжабай ардагер өнерпаздарға өнер бәсекесінде сәттілік тіледі. 
Қалалық ардагер өнерпаздар байқауының қорытынды кон-цертінің шымылдығын ардагер ұстаздардан құралған хор ұжымы "Жеңіс күні" әнін айтумен бастады. Хордың жеке даусында Ольга Беличенко, Шарбан Желдібаева, Баймұрат Жақсыбеков әуелете ән шырқаса, хормейстер Күлбаран Әбдіхалықова өнерпаздар ұжымына жақсы ұйтқы бола білді.
Ардагер ұстаз Баймұрат Жақсыбековтың, мемлекеттік қызмет саласының ардагері Сатыбалды Досымбековтың, ардагер Ардақ Рысбаеваның жеке дауыста айтқан "Землянка", "Кестелі орамал", "Біз – Отанның солдаты" әндері көрермендердің рухын көтеріп, оларға жақсы көңіл күй сыйлады. 
Осы арада Аманқұл Исқақов орындаған "Мұхиттың майданнан жазған хаты" әні көрермендерді үлкен әсерге бөледі. Жаралы жауынгердің далалық госпитальда әл үстінде жатып елде қалған анасы мен қарындасына жолдаған аяулы сөздері ешкімді бей-жай қалдырмады. Көрермендер арасында көзіне жас алғандар да болды. Бұл – кешегі күркіреп өткен соғыстың шынайы көрінісі болатын. Ардагер ұстаздардың вокал тобының орындауындағы "Туған ел", ұстаздар квартетінің орындауындағы Абайдың "Көзімнің қарасы" әндері, сөз жоқ отырған жастардың патриоттық сезімі мен туған жерге деген сүйіспеншілігін оятты десек артық айтқандық болмас. 
Қорытынды концертте әртүрлі жанрда өнерпаз ардагерлер сахнаға жиырма рет көтеріліп, қатысып отырған көрермендердің ыстық ықыласына бөленгенін айтуға тиістіміз. Исаева Кариманың орындауындағы "Памятник" әні, "Ару аналар" вокалды тобының орындауындағы "Батыр Бауыржан" әні  жиналған өнерсүйер қауымды бір желпінтіп тастады. Ардагер Леонид Необьявляющий орындаған Расул Ғамзатовтың сөзіне жазылған Ян Франкелдің атақты "Журавли" әні тыңдаған әрбір жанды толқытпай қоймады. 
Бір айта кетерлігі – концертке қатысқандардың дені қаладағы өнерпаз ардагер ұстаздар мен ұзақ өмір орталығының өнерлі аға буын өкілдері болғандығы. Қалалық ұзақ өмір орталығында қызмет алушылардың бишілер тобы "Фокстрот" биін нәшіне келтіре орындаса, "Калинка" тобы соғыс туралы әндерден топтама орындап, отырғандардың көңіл көкжиегін кеңейтті. "Әулиеата" ардагерлер ансамблінің орын-дауындағы "Көңіл толқыны" әні көптің көңілінен шықты.
Ардагер ұстаздардың фальклорлық ансамблі орындаған даңқты жерлесіміз Әбдімомын Желдібаевтың "Ерке сылқым" күйі, сөз жоқ өнер сүйер қауымына жақсы көңіл күй сыйлады. Қалалық байқаудың қорытынды концертінің шымылдығы белсенді ұзақ өмір орталығында қызмет алушылардан құралған хордың орындауында "Жеңіс күнінде" әнімен жабылды. 
Концерттен көрермендер де, келген қонақтар да үлкен әсермен шықты. Сахнаға көтерілген Тараз қалалық ардагерлер кеңесінің төрағасы Күләш Әбдікешова өнер бәсекесіне қатысқан барлық жеке орындаушыларға, өнер ұжымдарына алғысын айтып, ақшалай және заттай сыйлықтар табыстады. 
Ендігі кезек аудандардағы өнерпаз ардагерлерде. Біз олардан да өрелі өнер күтеміз. Ұлы Жеңістің 80 жылдығына арналған "Жеңіс туы желбірейді" байқауы зор шығармашылық бәсекелестік жағдайында өтетініне сенімдіміз. 
"ғұмыр-дария"– ақпарат
Суреттерді түсірген: Төлепберген СЕЙТҚАДІРОВ