АҚ ХАЛАТТЫ АБЗАЛ ЖАН

Саналы өмірінде өзі қалап сүйген кәсібіне және Гипократ антына адалдық танытқан денсаулық сақтау саласының ардагері, облысқа танымал дәрігер Тоқтагүл Аманжолқызы Досаеваны әріптестері, ол кісіден шипа алған талай азаматтар әр кез ризашылықпен еске алары сөзсіз. Жақында ғана ақ халатты абзал азаматымыздан, білікті дәрігер, аяулы ана, асыл жар Тоқтагүл Аманжолқызынан айырылып қалдық. Амал жоқ ол кісі туралы өткен шақпен сөйлеуге тура келіп отыр. Тоқтагүл Досаева 1940 жылы 8 сәуірде Меркі ауданының Қазақ Диқан ауылында өмір есігін ашып, Меркідегі орта мектепті ойдағыдай аяқтаған соң, өзінің жан қалауымен Ақтөбе қаласындағы медициналық институтқа түсіп, оның емдеу факультетін 1963 жылы бітіріп шығады. 
Еңбек жолын 1963 жылы Қостанай қалалық перзентханасында акушер-гинеколог болып бастайды. Жұбайы инженер Опабек Досаевтың қызметіне байланысты 1965-1967 жылдары Қордай ауданындағы ауылдық учаскелік аурухананың бас дәрігері болады. Жамбыл аудандық орталық ауруханасында оншақты жыл акушер-гинеколог болып қызмет атқарғаннан кейін 1975 жылдан бастап облыстық ауруханада дәрігер-гинеколог, дәрігер-статист, статистика бөлімінің меңгерушісі, бас дәрігердің ұйымдастыру-әдістемелік жұмыстар жөніндегі орынбасары қызметтерін үздіксіз зейнет жасына келгенше абыроймен атқарды. Зейнетке шыққаннан кейін де қол қусырып қарап отырмай облыстық сақтандыру қорында, медициналық қызметтің сапасын бақылау мекемесінде жұмыс істеді. 
Тоқтагүл Аманжолқызының ұзақ жылғы қажырлы еңбегі "Денсаулық сақтау ісінің үздігі", "Денсаулық сақтау ісіне қосқан үлесі үшін", "Алтын дәрігер", "Жамбыл облысына сіңірген еңбегі үшін", "Еңбек ардагері"  төсбелгілерімен аталып өтті. Ол бірқатар мерейтойлық медалдармен де марапатталды. 
Т. Досаева өмірде сыпайы, жаны таза, ойы терең, кәсібіне адал, қызметіне жауапты, ұжымда абыройлы, сыйлы кісі болды. Денсаулық сақтау саласында елу жылдан астам қызмет ете жүріп көптеген шәкірттер тәрбиеледі. Жұбайы Опабек ақсақал екеуі 3 ұл тәрбиелеп, 6 немере, 4 шөбере сүйді. 
Әріптесіміз Тоқтагүл Аманжол-қызының жарқын бейнесі оны білетіндердің есінде ұзақ уақыт сақталатын болады. 

Сабыр ОСПАНОВ, 
облыстық көпбейінді ауруханасы ардагерлер кеңесінің төрағасы