ТАРИХИ АТАУЛАРДЫ ТІРІЛТКЕН ДҰРЫС ҚОЙ

Кезінде Шона Смаханұлы ағамыз «Жыл өткен сайын жасарған...» деп жыр жолдарын арнаған Тараз қаласы қазір күн өткен сайын «тотыдайын таранып» құлпыра түсуде. Шаһардың шырайын кіргізіп, абаттандыруда қалалық әкімдіктің атқарып жатқан істері орасан зор. Ел игілігі жолындағы еңбектері жемісті бола берсін!Қала тұрғындарының саны 400 мың адамнан асқаннан кейін әкімшілік басқару жұмысын жетілдіру мақсатында шаһарды екі ауданға бөлу мәселесі туындаған. Осы мәселеге орай мен қалалық әкімдікке тұрғындардың ұсыныс-пікірлері жинақталғанда «Бір ауданға – Жібек жолы, екіншісіне – Әулиеата атауы берілсе, дұрыс болар еді» деген ұсыныс жасағандардың бірі болатынмын. Оған негіз де бар.
Әулиеата – қаланың гүлденген, дәуірлеген, атағы дүрілдеген шақтағы атауы. Ал, Шығыс пен Батыстың арасындағы алтын көпір болған Ұлы Жібек жолы – тарихтан тәбәрік. Тараз қаласы осы жолдың бойындағы үлкен сауда орталығы, бекет болғанына ешкімнің таласы жоқ.
Тараз қалалық маслихатының жуырда болып өткен сессиясында осы ұсыныс халық қалаулылары тарапынан қолдау тауып, депутаттар алдағы уақытта ашылатын аудандарға Әулиеата және Жібек жолы атауларын беру туралы бір тоқтамға келді.  
Ең бастысы – қаланың жаңа аудандарының атауы көпшілік көңілінен шығатындығына сенім мол.
Тарихи атауларды тірілткен дұрыс. Өйткені, біз осы арқылы бүгінгілердің, жас ұрпақтың өткенге құрмет көрсетуіне қол жеткізе аламыз.
Асан ҮСЕНБАЙҰЛЫ,
еңбек ардагері
Тараз