Біз жастарға сенеміз

«Қызмет қолдың кірі» деп жатамыз. Осы бір сөз тіркесінің әр жағында «Билікке қолың жетсе, айналаңды ұмытып кетпе, қарапайым бол» деген мағына жатыр ғой деп ойлаймын. Қызметтің ешкімге жабысып қалмайтыны да рас. Бірақ, бұл арада маңыздысы мансапқа қызығу емес, халыққа қызмет ету деп білемін.Өзім де мемлекеттік қызмет саласының ардагерімін. Кезінде облыстық деңгейде бірқатар қызметтерді шамамыздың келгенінше атқардық. Қазіргі таңда облыстық  басқармаларға басшы болып, аудандарға әкім болып өз облысымызда шыңдалған жас азаматтардың барып жатқаны қуантады. Бұл облыс әкімі Ербол Қарашөкеевтің жас мамандарға деген жанашырлығы деп түсінемін. Мәселен, өткен жылдың соңғы күндерінде өңіріміздегі аумағы үлкен, халқының саны көп Байзақ, Меркі аудандарына жаңадан әкімдер тағайындалды. Яғни, 38 және 39 жастағы азаматтар осы аудандарға басшы болып барды. Жаңадан тағайындалған  жас азаматтардан үлкен үміт күтеміз. Аталған аудандардың жақсы жетістіктері де бар. Бірақ, елді мазалаған мәселелері де жоқ емес. Ол жайттарды шешу аталған азаматтардың қолынан келеді деп білемін. 
Мұндай тәжірибе біздің өңірде мұның алдында да  болған, Бақтияр Артаев -26, Айнұр Сәденова -28 жастарында басқарма басшысы болды. Қанатбек Мәдібек, Нұржан Календеров, Сәкен Арубаев деген азаматтардың дәл 35 жастарында аудандарды басқарғандарын білеміз. Қазіргі таңда Сәкен Арубаев – ҚР Парламенті Сенатының депутаты болса, өзгелері облыс әкімінің орынбасары болып абыройлы қызмет атқарып жүр.  
«Мен жастарға сенемін» деп Мағжан Жұмабаев айтқандай,   жас азаматтардың басшылыққа  келгені қуантады. Себебі, болашақ жастарда. 
Жеңісбек ЕГЕМБЕРДИЕВ,
 мемлекеттік қызмет саласының ардагері