АЭС ҚАЗАҚСТАНҒА НЕ ҮШІН ҚАЖЕТ?

Еліміздегі 6 саяси партия мен 20 қоғамдық ұйым АЭС салуды қолдау жөніндегі Халықтық штабқа біріккен болатын. Күні кеше Тараз қаласына келген «AMANAT» партиясының төрағасы Ерлан Қошанов АЭС салуды қолдау жөніндегі Халықтық штабтың отырысын өткізді. Штабтың мақсаты – халықты атом электр станциясын салу жөніндегі прогрессивті идеясының төңірегінде топтастыру. Партия төрағасы атап өткендей, бұл – ең алдымен, қауіпсіз, сенімді, экологиялық таза жоба. Сондықтан Халықтық штабтың міндеті – ел арасында кең ауқымды түсіндіру жұмыстарын жүргізіп, қоғамды АЭС-ті қолдауға жұмылдыру. Штабтың мәжілісіне облыстық ардагерлер кеңесінің төрағасы Еркінбек Солтыбаев, Тараз қалалық ардагерлер кеңесінің төрағасы Күләш Абдікешова және қоғамдық ұйымдардың өкілдері, белсенді ардагерлері қатысты.