Білгенге-маржан

Жаңғақтардың адам ағзасына тигізер пайдасы өте мол. Олар ағзаны қалыпты жағдайда ұстап, түрлі ауруларға қарсы күресетін күш береді. Жаңғақтың түрлері өте көп және әрқайсысының өз алдына емдік қасиеттері бар. Бүгін біз солардың бірі – грек жаңғағы туралы айтамыз.
Бұл жаңғақтар күш-қуатымызды қалыпқа келтіріп, бойдағы сырқатты жеңуге көмектеседі. Мәселен, қант диабеті. Оның белгілі бір мөлшерін күнделікті ас мәзіріне қосып отырған жөн. Бірақ дәрігерлер күніне 100 грамын ғана пайдалануға кеңес береді, одан көп жеу зиян келтіруі мүмкін. Грек жаңғағы атеросклероз ауруына шалдыққан кезде жақсы көмектеседі. Ми белсенділігін арттырады, ішек жұмысын жақсартады.
Оның құрамында дәрумендер, минералдар, түрлі майлар бар. Олар: В1, В2, С, РР, май, хинон, каротин, жасұнық, тұз т.б. Тіпті, жаңғақ ағашының жапырағының құрамында да денсаулыққа пайдалы элементтер бар.
Жаңғақтың пайдасының мол екенін халық медицинасы да дәлелдеп келеді. Өзі ғана емес, қабығы мен жапырағы да емдік мақсатта жиі қолданылады. Жапырағынан ауыз қуысына және қызыл иекке арналған тұнба жасайды. Сондай-ақ, оның қайнатпасы жараның тез жазылуына көмектеседі. Ішекқұрт, қабыну, қант диабеті ауруларынан айығуға көмектеседі. Қан құрамындағы холестеринді азайтады.