Майдангерлерге - бір миллион теңге

Ұлы Жеңістің 75 жылдығы мерекесі қарсаңында облыс әкімі Бердібек Сапарбаев 95 жасқа толған абыз қария, Ұлы Отан соғысының ардагері, Жамбыл облысы мен Тараз қаласының Құрметті азаматы Тілеуқабыл Төребековтің шаңырағында болып, ілтипат көрсетті. Өңірімізде Тілеуқабыл Төребековті білмейтін адам кемде-кем. Ол кісі Кеңес әскерлерінің қатарында  милитаристік Жапониямен соғыста ерлік көрсетті. Соғыстан кейінгі жылдарда халық шаруашылығын қалпына келтіруге аянбай тер төкті. Облыстық партия комитеті бірінші хатшысының көмекшісі, бөлім меңгерушісі, Тараз қалалық партия комитетінің екінші хатшысы, 1970 жылдан 1983 жылға дейін 13 жыл бойы Жамбыл қалалық атқару комитетінің төрағасы қызметтерін абыроймен атқарды. Қалабасы болып жүрген кезінде облыс орталығы 10 жыл қатарынан республика бойынша ең жасыл желекке оранған таза қала ретінде жеңіс тұғырынан көрінді. Тілеуқабыл Төребекұлы зейнетке шыққаннан кейін де қоғамдық өмірден тыс қалған жоқ, 20 жыл бойы ол кісі облыстық ардагерлер ұйымын басқарып, аға ұрпақ өкілдерінің әлеуметтік құқықтарының қорғалуына, олардың белсенді қоғамдық өмірге кеңінен тартылуына жағдай жасады. Облыстық ардагерлер ұйымының қалыптасып нығаюына, бұқаралық қозғалысқа айналуына негіз қалады. 
Облыс басшысы Тілеуқабыл Төребековке Қазақстан Республикасының Президенті Қасым-Жомарт Тоқаевтың Құттықтау хатын және 1 миллион теңгенің сертификатын табыс етті.  Ол кісінің үшінші дәрежелі "Даңқ", екінші дәрежелі "Отан  соғысы", "Еңбек Қызыл Ту", "Құрмет  белгісі"  орден-дерімен және бірнеше медальдармен марапатталғандығын атап өте келе, тұғыры биік тұлғаның өмір жолы бүгінгі ұрпақ үшін үлгі-өнеге болып қала беретіндігін тілге тиек етті. 
Облыстық ардагерлер кеңесіне 20 жыл бойы үздіксіз жетекшілік еткен ел қариясы Тілеуқабыл Төребековті сәл бұрынырақ облыстық ардагерлер кеңесінің төрағасы Еркінбек Солтыбаев бастаған бір топ өкшелес інілері 95 жасқа толуымен құттықтап шыққан болатын. Е.Солтыбаев облыс ардагерлер қозғалысын қалыптастыру мен дамытуға өлшеусіз үлес қосқан Т.Төребековке "Ардагерлер ұйымы" республикалық қоғамдық бірлестігі орталық кеңесінің және облыстық ардагерлер кеңесінің Құттықтау хатын табыс етіп, ол кісіге зор денсаулық, ұрпағына бірлік-береке тіледі. 
Тілеуқабыл Төребекұлы өз кезегінде зор құрмет көрсеткен облыс әкіміне және облыстық ардагерлер кеңесіне ризашылығын білдіріп, ақ батасын берді.