Көрші тату болса – берекең молаяды

Біз бәріміз бір ауылдың топырағында аунап, бір бұлақтан су ішкен, әртүрлі этнос өкілдерінен құралған бір үйдің баласындай болып кеткен жандармыз. Қонаев ауылы – ынтымақтың, татулықтың, бірліктің ордасы. "Алтау ала болса – ауыздағы кетеді, төртеу түгел болса – төбедегі келеді" деген дана сөз бар. Біздің күшіміз – бірлікте, біздің байлығымыз – татулықта. Ата-бабаларымыз "Көршің тату болса – қораң кең" деп бекер айтпаған. Өйткені көрші – ең жақын жанашыр, қиын күнде қол ұшын беретін, қуанышыңды бірге бөлісетін жан. Ұлтымызға, тілімізге, дінімізге қарамай, біз бәріміз бір ауылдың қара шаңырағында тату өмір сүріп келеміз. Осы ұстанымды ту еткен Қонаев ауылдық ардагерлер ұйымының билер кеңесі құрамында Бинали Ильясұлы Тагиров, Минзакир Шакирұлы Каримов сияқты абыройлы, белсенді ардагерлері бар ауыл тұрғындарының тыныштығы мен берекесін сақтау мақсатында көптеген істер атқаруда. Соңғы кезде атқарған жұмыстарымызға нақтырақ тоқталып өтетін болсам, ауыл тұрғындары (аттарын атамағанды дұрыс көрдік) арасында жер телімінің шекарасына қатысты дау туындады. Б.А. деген азамат көршісінің өз ауласын кеңейту мақсатында ортақ пайдаланылатын жердің бір бөлігін заңсыз именденгенін алға тартты. Бұл жерді бұрыннан өз шаруашылығы үшін пайдаланып келе жатқанын айтып жердің, өзіне тиесілі екенін мәлімдеді. Осыдан барып көршілер арасында әжептеуір дау туындады. 
Билер алқасы бұл істі ушықтармай дереу қолға алып, төмендегідейжұмыстарды атқарды.
– ауыл әкімдігінің жер бөлу құжаттары зерттелді;
– аудандық жер қатынастары бөлімінің картографиялық деректері қарастырылды; 
– Тұрғындардың куәліктері тыңдалды (көршілер мен ақсақалдары);
– нәтижесінде дау өз шешімін тапты. 
Жер телімінің ресми құжаттарына сәйкес, Н.С мырзаның жер телімі бастапқы шекарасына қайтарылу тиіс, заңсыз иемденген 2 соттық жерді босатып, ортақ пайдаланылатын аймаққа қайта өткізуі керек, – деген ұйғарым жасалып, екі тарап татуласу туралы келісімге қол қойды. 
Ортақ пайдаланылатын жерлерге қатысты болашақта осындай даулар туындамас үшін, арнайы белгілер орнату тапсырылды. 
Билер кеңесінің төрағасы ретінде: 
– Қадірменді ағайын, ардақты ауылдастар! 
Бүгін біз ауылдың тыныштығы мен ынтымағын сақтау үшін жиналдық. "Тура биде туған жоқ, туғанды биде иман жоқ" дейді дана халқымыз. Біздің міндетіміз – әділ төрелік айтып, ағайынның арасын жарастыру. Сендер көрші ғана емес, ауылдас азаматсыңдар. "Көрші ақысы – Тәңір ақысы" деп бекер айтылмаған. Көршімен тату тұрған адамның шаңырағы шайқалмайды, ырысы кемімейді. Бірақ бүгінгі дауларың – ортақ шекараға қатысты. жер – ата-бабамыздан қалған қастерлі мұра. "Жер дауы – ел дауы" деген, сондықтан бұл мәселені әділетті түрде шешу – біздің парызымыз. 
Құжаттарға көз жүгірттік, куәларды тыңдадық, ақиқатқа көз жеткіздік. Шындықтың жүзі – суық, бірақ әділдік салтанат құруы керек. Көршінің жеріне заңсыз кіру орын алғаны анықталды. Бұл – көршіге жасалған әділетсіздік. Алайда, біз арсыздықтың отын емес, татулықтың дәнін себуге тиіспіз. 
Б.А. мырза, сізден өтініш – ортақ жерге қол сұқпай, бауырлық пен көршілік сыйластықты сақтаңыз. "Қазық қағылған жер даулы болмайды" дейді. Бүгін осы шекара белгіленді, бұдан былай оған талас болмасын. Ағайындық кеңдік танытып, кешірімді болайық. "Ағайын – араз болса, ауыздағы кетеді, тату болса, табақтағы жетеді". 
Екеуіңнің бірлігің – ауылдың берекесі. Ынтымақты сақтау – баршамызға сын. Сондықтан осы шешімге келісіп, татулықпен тарқасайық. Ертеңгі күні бір-біріңнің есігіңді қағасыңдар, қуанышыңды бөлісерсіңдер. "Ағайын тату болса – ат көп, абысын тату болса – ас көп". Сол себепті, елдігімізді жоғалтпай, бүгінгі даудан кейін бір-біріңе ағайындық көңілмен қараңдар. 
Ал енді, осымен бұл даудың нүктесі қойылды. Ауылдың ауызбіршілігін бұзбай, тату-тәтті өмір сүрейік!, – деп алақандай ауылымыздағы екі көршінің арасында бұрқ ете қалған дауды ақылмен шешіп, аталы сөзімді айттым. Билер кеңесінің бұл туралы шешімін ауылдастарым бірауыздан қолдады. 
Билер кеңесінің шешімі ауыл тұрғындарының алдында әділ деп танылып, екі тарап мәмілеге келді. Кеңес мүшелері осындай дауларды болдырмау үшін тұрғындарды жер құжаттарын уақытылы рәсімдеуге және заңға сай әрекет етуге шақырды. 

Жексембек БАХТИЯРОВ, 
Қонаев ауылдық
билер кеңесінің төрағасы

Шу ауданы