Жақсы көрші тапқаның, мол олжаға батқаның

Журналист Дариха Үмбетиярованың "Ал, сіз көршіңізбен қалайсыз?" деген мақаласында бүгінгі күннің түйінді мәселелері, тұрғындарды ойландыратын жәйттер дөп айтылыпты. Расында, көршісінің жақсы болғанын кім қаламайды дейсіз? Былайша ойлап қарасаң, өміріңнің мәнді де сәнді өтуі, бір жағынан көршілеріңе де байланысты. Көршің жақсы болса, емін-еркін араласып, қуаныш-жұбаныштарды бірге бөлісесің. Ал, көршің нашар болса, көңілің орнықты болмай, елегізіп отырасың. Қазақтан сөз қалған ба!? "Атың жаман болса сатып құтыласың, көршің жаман болса қайтіп құтыласың?" деген ғой. Оның бір жолы, амал жоқ көшіп құтылуға тырысасың. Ал, көшіп-қону бір отбасына оңай соқпайды. Көршілермен аралас-құралас болмақ түгілі, төңірегіне шекесінен қарайтындар арамызда аз емес. Ол ол ма, кейбір көршілер қоқысын пакетке салып, кіреберіске тастай салады. Ол аз десеңіз сол пакетін терезеден лақтыратындар да кездесіп қалып жатады. Көктемге қарай көршілер болып жиылып, сенбіліктер ұйымдастырып жатқанда төбе көрсетпейтіндер де бар. 
Тотыдайын таранған, көк желекке бөленген әсем шаһарымыз елді өзінің ерекше көркімен сүйсіндіруінен танбауда. Сондықтан да әрбір саналы азамат өзі тұрып жатқан қаласына жанашырлықпен қарап, аялай білуі керек. 
Мен өзім көршілеріме дән ризамын. Біз "Жансая" шағын ауданындағы төрт қабатты тұрғын үйде 16 отбасы тұрамыз. Бір есіктен кіріп, бір есіктен шығамыз. Мерекелерде бір-бірімізді құттықтау қалыпты жағдайға айналған. Нәрестелер дүниеге келгенде шілдехана қуанышын бірге тойлап, жақсы тілегімізді білдіріп жатамыз. Өткен жылы Наурыз мейрамын есте қаларлықтай етіп өткіздік. 16 отбасы тегіс жиналып, есіктің алдындағы аулаға дастархан жайдық. Осы үйде тұратын 3 бүлдіршіннің тұсауын кестік. Түрлі жарыстар ұйымдастырып, оған үлкеніміз болып, кішіміз болып тегіс қатыстық. 
Тұрған үйімізді, оның маңайын таза ұстауды міндетіміз деп білеміз. Барлық жұмысқа бір кісідей жұмыламыз. Үйдің кіреберісін кезектесіп жуып, тазалаймыз. Бірлесе күш жұмылдырудың арқасында ауламызда тал-тарақтар, гүлдің неше атасы жайқалып өсіп тұр. Тұрғындардың күшімен шағын футбол алаңшасы салынған. Балалар ойнайтын алаңдар да бар. Осы тіршіліктің барлығына бас болып жүрген осы тұрғын үйіміздің басшысы Айман қарындасымызға алғысымыз шексіз. 
"Көршің қолайлы болса қораң кең" дегендей осындай татулықтың арқасында бізде бейсеует жүретін адамдар жоқ. Тәртіпсіздік, келеңсіз көріністерге жол берілмейді. 
Жалпы журналист Дариха Үмбетиярованың мақаласында бүгінгі өміріміздің өзекті мәселесі көтерілген. Айналып келгенде күлбілтелемей турасын айтатын болсақ, тату тәтті, ынтымағымыз жарасып, береке-бірлікте тұру, өмір сүру өзімізге байланысты. Көршілердің үлкендері болса ұлағатын көрсетіп жатса, кішілері болса ізетін танытып жатса қанекей! Міне, менің айтайын дегенім осы.

Алдаберді Мақашев, 
мемлекеттік қызметтің ардагері
Тараз қаласы