САРАСӨЗ

Орындалмайтын серт те бір, оңалмайтын дерт те бір.

***

Патшасы қайырымсыз елдің, халқы мейірімсіз болады.

***

Үйренем дейтіндер бар болса, үйрететіндер де табылар. 

***

Кейбір қазақтарды түйеқұсқа ұқсатамын. Себебі, түйеқұс не биікке ұшпайды, не арқасына жүк артқызбайды. Еш жерге де, ешкімге де пайдасы жоқ.

***

Халықты тығырықтан шығаратын жол іздемегендер жұмаққа да жол іздемей-ақ қойғандары жөн болар еді.

***

Шәйнекті - бақыттың бастауы деп алатын болсақ, екі кесе – екі жастың ырысты ыдыстары. Егер олардың татулықтары мен махаббаттары баянды болса, кеселері көбейе беретіні күмәнсіз.

***

Татулығының туы биік, шаттығының шуы басым елдімекенге бақ-береке үй салады.

***

Қазіргі қазақ қоғамында асылдардан гөрі, масылдар көбейіп барады.

***

Әйел заты жабық киінген сайын қымбат әрі жұмбақ болады.

***

Қазақcтанның билік басындағылар саясаттан гөрі, саяхатты көбірек ойлайтын болды. 

***

Әлемдегі ең әдемі әрі ең қымбат сурет - Ананың асыл бейнесі.

***

Танымы жоғары адамның тамыры тереңде болады. 

***

Сайтандар салтанат құрған жерде еркекте сес болмайды, әйелде ес қалмайды.

***

Адами қалпынан айнымайтын адамның артынан жақсы сөз ереді. 

***

Ой көсемдігі мен сөз шешендігінің ұлы ұстазы – кітап.

***

Құлқынның құлы болғанша, ұлтыңның ұлы болған артық.

***

Жылы жүздесулер – нұрлы күн кешулер.

***

Өмір деген – көз ілмейтін қарауыл, уақыт деген мызғымайтын төреші.

***

Сөз - жүректің үні, 

Көз - көңілдің гүлі.

***

Жұма – күнәлар жуылатын, бойдағы жын-шайтан қуылатын күн.

***

Бассыздыққа бастайтын жаман басшыларды жақсы бақсыларға көрсетіп алған артық болмас еді.

***

Ақын мен жазушы – 

Ой кенін қазушы.

***

Әкімі нашар ауыл – 

Күзді күнгі дауыл.

***

Алла жер-көктегі сұлулық пен жылылықтың бәрін әйелге қарап жаратқан.

***

Менің сөнбес шамым – білім мен таным. 

***

Білім мен тәлім алып қана қоймай, өзін-өзі тәрбиелей жүріп  есейген адамның орны алтын тақтан да биік.

***

Әйелі еркелей білсе, еркегінің ерсі қылықтары жойылар еді.

* * *

Таққа отырғандар жаман болса, атқа отырғандар надан болады.

***

Бейқамдық пен меймандық қазекеңнің өзгермейтін не өзгеге бермейтін ұстанымы сияқты.

***

Өмір деген – бес күндік, ал, уақыт – желден жүйрік бес киік. 

(Жалғасы бар)