Д.ҚОНАЕВ ЕСКЕРТКІШІН ТҰРҒЫЗУ – ХАЛЫҚТЫҚ ҚҰРЛЫСҚА АЙНАЛДЫ

Қорға елдің "мен" деген азаматтарын жинадық, кәсіппен айналысып жүрген қалталы жігіттерге хат жолдадық. "Көп түкірсе – көл" деген, халық жабылып кетіп еді, нәтиже жаман болған жоқ. Бірақ, мойындауымыз керек, уақытты біраз созып алдық. Бастапқы жоспарымыз Димекеңнің туған күніне – 12 қаңтарға бәрін дайын етеміз дегенбіз ғой. Оған үлгере алмадық. Оның үстіне қаңтардағы атышулы оқиғалар да өзінің кері әсерін тигізді. Шынын айтқанда жұмыстың кешеуілдеуінің бізге пайдалы жақтарыда болды.  
ТІЛШІ: Ол қандай жағдай, нақтылай кетсеңіз?
Қибат АСҚАРБЕКОВ: Өздеріңіз білесіздер, сол екі аралықта "қанды қаңтар" оқиғасы болды, өткен 30 жылдағы көптеген жағдайларға көзқарас өзгерді, биліктің қоябасы ашылды, соның ішінде Дінмұхамед Қонаевтың тарихи еңбегіне деген жаңа көзқарас қалыптасты. Мемлекет басшысы Қасым-Жомарт Тоқаев өзінің наурыз айындағы Қазақстан халқына Жолдауында  Дінмұхамед Қонаевтың Қазақстан тарихындағы еңбегін айрықша атай отырып, ол кісінің есімін Қапшағай қаласына беру туралы мәселе көтерді. Тәуелсіздік тарихында, сөйтіп Димекеңнің аяулы есімі ең жоғары саяси билік тарапынан өзінің лайықты бағасын алды.
Ендігі жерде әншейінде Д.Қонаевтың аты аталса, қаша жөнелетін әкімқараларға "жасыл көше" ашылды. Біз де бұрынғыдай бүгежектемей, шаруамызды биліктің алдында батыл айтатын жағдайға жеттік.
ТІЛШІ: Жапар Күздеубекұлы, Сіз  Д.Қонаевқа ескерткіш тұрғызу жөнінде бастама көтерілген алғашқы күннен осы шаруаның басы-қасында шапқылып жүрсіз. Қаржы жинаудың оңай емес екенін біз жақсы білеміз. Осы жайында байыптап әңгімелеп берсеңіз деген тілегіміз бар. 
Жапар КҮЗДЕУБЕКОВ: Әрине, бастама көтерумен, жиылып алып ақыл-кеңес жасаумен шаруа бітпейді. Біз өзі қазақ әңгімеге құмарлау халықпыз ғой. Күні бойы осы қорда отырамын, келген-кеткен адамдармен әңгіме-сұхбат құрамын.  Еңбегімен елге танылып жүрген сөзі өтімді азаматтарға телефон шаламын. Сонда байқағаным, Дінмұхамед Ахметұлына деген елдің алабөтен пейілінің кеңдігі, сүйіспеншілігінің зор екендігі, ықыласының  айрықшалығы болды. 
Міне,  бүгінде ескерткіш тұрғызылды, маңайы көріктендірілді. Көріктендірілді дегеннен шығады, осы жұмыс басталған кезде жекелеген пысықайлар әлеуметтік желіде біздің осынау игілікті тіршілігімізге "шабуылға" шықты. Жазасын  бір  Алла  берер олардың, бірақ сол әлеуметтік желілерде оларды адамдардың өзі оңдырмады. Сонда ол "блогерсымақтардың" айтатыны не? "Не айтасың, Д.Қонаевтың ескерткішіне бюджеттен 30 миллион ақша бөлініпті, оған ескерткіштің маңайында көріктендіру жұмыстары жүріп жатыр екен". Сонда қоятын кінәсі осы. Қойылса, Қонаев сияқты ұлы тұлғаға халықтан жиналған 50 миллион теңгеге ескерткіш сомдалды. Қала бюджетінен 34 миллион теңге қаржы бөлінсе, сол қаланың көркіне көрік қосатын жаңа сквер пайдалануға берілді. Күні ертең осы ескерткіштің маңайына жастар келіп серуен құрады, тұрғындар отырып, саялы бақта бір мезгіл демалады. Біздің қысқа ойлайтын "ақылмандарымыз" осы жағын байыптады ма екен?! 
Жарайды, бұл – басқа әңгіме. Ендігі жерде, қаржының жиналуына келер болсақ, азды-көпті ниет білдірген бүкіл әулиаталықтарға ризашылығымыз шексіз. 50 миллионнан аса теңге жиналды деп жоғары да айттым, қордың есепшотына азды-көпті 460 адам өз үлестерін теңгелей қосыпты. Қонаевтың ескерткішін тұрғызуды осыдан кейін халықтық құрылыс демей көріңіз. Мынаны қараңыз, бір мың теңгесін әкелген қарапайым қалалыққа қалай риза болмассың?   Атын атамай-ақ қояйын, бір азамат қорға келіп: "Азырқанбаңыздар, ұлы адамның шапағаты тисін деп, бала-шағамының аузынан жырып, үш мың теңге әкелдім. Қабыл алыңыздар!" дегенде толқып кеттік. Бұл – ұлы Димекеңе деген елінің құрметі. Ал, енді бір миллион теңгеден  бастап жеті миллион теңгеге дейін қаржы құйған азаматтарға Алланың нұры жаусын! Мәселен, Марат Сапарұлы Рахманбердиев деген азаматымыз жеті миллион теңге қаржы аударды, Мәмед Добрышев деген түрік бауырымыз екі миллион, Жаңабек Сұлтанбеков қария 1,2 миллион, Қазақстанның Еңбек Ері Мұқаш Ескендіров, кәсіпкерлер Алтынбек Садырбаев, Талғат Нұралиев, Досымұхан Аралбаев, Ерболат Саурықов, Мәди Болысбеков, Талғат Жолтаев, Тайбалис Нұралиев, Байқошқаровтар әулеті, басқа да көптеген азаматтарымыз бір миллион теңгеден қаржы салды. Күні кеше Қазақстан Республикасы Парламенті Сенатының депутаты, жерлесіміз Бекболат Орынбеков атқарылып жатқан жұмыстармен танысып, ортақ іске өзінің лайықты үлесін қосты. Талас ауданының әкімі Қанатбек Мәдібектің де қолдауы аз болмады. Сондай-ақ, Талас ауданындағы Ойық, Бөлтірік, Аққұм, Сейілбек ауылдарынан жанашырлық танытқан ағайындарға ризашылығымыз шексіз. Өздеріңіз түсініп отырсыздар, 50 миллиион теңге деген аз  ақша емес. Қомақты қаржыны халық иығымен көтерді. Бүгін, барлық жұмыс аяқталып, қазақ деген халықтың маңдайына біткен бәйтерегі, асыл азаматы Дінмұхамед Қонаевтай қайраткер тұлғаға еңселі ескерткіш тұрғызылған сәтте осынау үлкен шаруаға үлес қосқандардың бәріне ризашылығымызды айтқымыз келеді.
ТІЛШІ: Ризашылық дегеннен шығады, біраз мәселенің бетін қайырған сияқтымыз. Дегенмен, Қибат Тілеуқұлұлы, айтыңызшы, қыруар тіршілік атқарылды, басы-қасында жүрдіңіздер. Бұндайда жиналған қаржыдан бөлек ел азаматтарының қолдау көмегінің де, сөз жәрдемінің де қанаттандыратыны рас қой. Осы орайда не айтар едіңіз?
Қибат АСҚАРБЕКОВ:  Рас айтасыз, мен айтар едім, бұл ұлағатты жұмыс ең алдымен көптің батасымен бітті. Ең алдымен ғасырға жуық жасаған абыз қариямыз Баттал Жаңабаевтың батасын алдық. Бұрынғы облыс әкімі Бердібек Сапарбаев өзі келіп, қорға бас сұғып. жұмыс жоспарымызбен  таныстты. Қолынан келгенше, қолдау көрсететінін айтты.  Ал, енді облысымыздың жаңа әкімі Нұржан Нұржігітов тағайындалғанынан көп уақыт өтпей қорға арнайы келіп, атқарылып жатқан жұмыстың барысымен танысты. Тиісті тұлғаларға тапсырмасын берді. Ескерткіштің ашылу салтанатын жоғары деңгейде өткізуге қолдау көрсететінін білдірді. Бұл енді билік тарапынан біздің сезінген шарапатымыз. Облысымыздың қадірменді ақсақалдарының жұмысымызға үнемі қолдау көрсетіп отырғандарын айтуға тиістімін. Облыстың Құрметті азаматтары Амангелді Карентаев, Сембек Сейдәзімов, Қайрат Шотпақов, басқа да көптеген жанашыр қариялардың үнемі ақыл-кеңесін, қолдауын естіп отырдық. Тараз қалалық мәслихатының хатшысы Батырбек Құлекеевтің осы жұмыстағы жанашырлығы өз алдына бөлек әңгіме. 
Бір сөзбен айтқанда, үлкен тіршілік атқарылды. Тарихта ізі қалар іс бітті. Сондықтан не айтамыз? Д.Қонаевтай тұғырлы тұлғаның еңселі ескерткішінің қаламыздан бой көтергені, ол – жүздеген, мыңдаған тараздықтардың, әулиататықтардыың ортақ қуанышы. 
Ортақ қуаныш құтты болсын!
ТІЛШІ: Әңгімелеріңізге рахмет! Пай-далы, келелі қоғамдық қызметтеріңізге табыс тілеймін!