БИ ӘДІЛ БОЛМАЙ – ІС ІЛГЕРІ БАСПАЙДЫ

Талас аудандық билер кеңесінің ықпал етуімен елді мекендерде салауатты өмір-салтын қалыптастыру бағытында бірқатар жұмыстар атқарылуда. Билеріміз оқу орындарында білімгерлермен кездесіп, зорлық-зомбылықтың алдын алу жөнінде әңгімелер өткізуде. Жақында ғана Қаратау ауылдық округі салауатты ауылға айналды. Ардагерлердің, әсіресе билердің тікелей ұйымдастыруымен  Бостандық, Аққұм, Шәкіров, Тамды, Қызыләуіт ауылдарында отбасы құндылығы жөнінде, әлеуметтік желі мен онлайн ойындарының зияны төңірегінде жиындар өткізілді. Мысалы, Қызыләуіт ауылында оқушылар арасында орын алған әлімжеттік дерегі анықталып, ата-аналарымен, ұстаздарымен бірлесе жұмыс жүргізіліп, бұзақылықтың алды алынды. Бостандық ауылында билер кеңесінің төрағасы Ж.Есімовтің тікелей араласуымен екі мектепте учаскелік полиция өкілінің, психологтың қатысуымен жиындар өткізілді. Осындай келелі әңгіме Шәкіров ауылында да қолға алынып отыр. Соңғы кездері Бостандық ауылының ардагерлері жаназада аста-төк дарақылыққа тоқтам салу  жөнінде бәтуә жасасты. Осы туралы Ойық ауылында өткізілген облыстық ардагерлер кеңесінің көшпелі семинарында қабылданған Үндеу барлық елді мекендерге таратылды. Әрине, бәрін бірден шеше салу мүмкін емес. Бірақ әрекетсіз емеспіз. 
Соңғы кездері Тамды ауылдық билер кеңесінің төрағасы Қанатбек Құралбаев  ел арасында белең ала бастаған тойлардағы шектен шыққан даңғазалық, дарақылық туралы айтып, дабыл қағуда. Тіпті кейбір ардагерлеріміз тойды күндіз өткізуді ұсынып жүр. Естуімізше Қарағанды облысында той-домалақтар күндіз өткізіледі екен. Бұл да  құптарлық тірлік деп есептейміз. Осыдан үш-төрт жыл бұрын біздер көкпарда ішімдікке жол бермеу жөнінде  бәтуә жасасқан едік, біздің бұл ұсынысымызды халық құптады, соның нәтижесінде көкпарда ішімдік ішу тиылып, мертігушілер дерегі тіркелген жоқ. 
Біздің ойымызша ардагерлер өздері бас болып, халықтық тәрбиені қолға алу керек. Бізді кім тыңдайды деген әңгімеге орын болмауы тиіс. Ол үшін, әрине сөзі уәлі, ауызы дуалы ақсақалдарды қатарымызға көбірек тартуымыз керек. Сонда ғана ісіміз оңға басады.
Таяуда ғана Талас аудандық билер кеңесі жыл қорытындысын шығарды. Жыл ішінде аудандық соттан келген ұйғарымдардың саны 70-ке жетті. Олардың  60 пайызы  шешімін тапты. Аудандық соттың медиация кабинетінде біздің билердің қатысуымен 30   іс қаралып, оның 28-і оң шешілді. Жыл қорытындысымен Қаратау қалалық билер кеңесінің төрағасы Дүйсенбек Томанов «2024 жылдың үздік биі» деп танылды. Өйткені, қаралған дау-дамайдың 80  пайызы  қалалық билер кеңесінің араласуымен шешімін табуда. Сондай-ақ, «Ең белсенді би» атағын билер кеңесінің мүшесі Қонақбай Қалжанов иеленді. «Ең сыйлы ақсақал» атағын Ойық ауылы билер кеңесінің төрағасы Пана Рахманбердіұлы алғаш рет иеленіп отыр. Билер кеңесінің жұмысына белсене қатысып жүрген Тамды ауылдық билер кеңесінің төрағасы Қанатбек Құралбаев, аудандық билер кеңесінің мүшесі Ілиясбек Жуасбековтердің еңбектері атап өтілді. Соңғы кездері Қызыләуіт, Үшарал ауылдарында да билер құрылымын қалыптастыру жолға қойылды. Кеңес ауылдық округінде билер кеңесінің құрамы қайтадан жасақталды. Соның арқасында жиырма елді мекендегі билердің саны 70-ке жетіп отыр. 
Өмір көрсетіп отырғанындай елге ақыл-кеңес беретін, жөн сілтейтін, жеке басымен үлгі өнеге көрсететін ақсақалдардың қажеттігі сезілуде. Біз өзара әңгімемізде ақсақалдық жасқа жеткен ардагерлерден  өз жастарына лайықты әрекет етулерін, жеңілтектікке салынбауларын, парасаттылық көрсетулерін қашан да сұранып отырамыз. Бүгінгі ұрпақтың  болашағына біздер жауапты екендігімізді естерінен шығармаса екен дейміз. 
Осы ұлы мақсат жолында ақсақалдарымыз адал, иманды, белсенді, ұлтшыл, намысты болсын деп тілейік. 
Сәулембай ӘБСАДЫҚҰЛЫ, 
Талас аудандық билер кеңесінің төрағасы