«Ризашылық – мейірімділік бұлағы» атты іс– шара өтті

1 наурыз – Алғыс айту күніне орай «Достық үйінде» «Ризашылық – мейірімділік бұлағы» мерекелік іс-шара өтті.

Салтанатты шараға Жамбыл облысының әкімі Ербол Қарашөкеев, шаһар басшысы Бақытжан Орынбеков, ардагерлер, зиялы қауым мен этнос өкілдері қатысты.

Әуелі жиналған көпшілік «Қазақстан халқы Ассамблеясына – 30 жыл» ескерткіш тақтасының ашылуына куә болып, әр жылдары қазақ жеріне қоныс аударылған түрлі ұлт өкілдерінің тарихынан сыр шертетін фотосуреттер мен мұрағат материалдары топтастырылған көрмені тамашалады.

Бұдан кейін аймақ басшысы Ербол Шырақпайұлы Мемлекет басшысының құттықтау хатын оқып беріп, өзінің ақжарма тілегін арнады.

– Мейірімділіктің мерейлі мерекесінде Қазақстан халқы Ассамблеясының құрылғанына 30 жыл толып отыр.  Осынау жылдар белесінде Қазақстан халқы Ассамблеясы бейбітшілік пен келісімді ту етіп, ел бірлігін бекемдей түсті. Жасампаз істердің жаршысына айналып, биік белестерді бағындырды. Достық пен ынтымақтың ордасы Жамбыл облысында бүгінде 87 этнос өкілі өзара түсіністікте тату-тәтті тұрмыс кешіп, өңірдің дамуына сүбелі үлес қосуда. Олардың барлығы дерлік ел басына күн туған шақта жұдырықтай жұмылып, сауапты істерден қалыс қалмады.  

Мемлекет басшысы Қасым-Жомарт Кемелұлы Тоқаев атап өткендей, елдігімізді қорғаудың басты жолы – берекелі бірлік.  Бірлік, татулық пен тұрақтылық бәрінен биік! Бағалай білмегенге бақ қонбайды. Сондықтан ең құнды, ең асыл қазынамыз – береке-бірлігімізді көздің қарашығындай сақтап, болашақ ұрпаққа аманаттау үшін бір жағадан бас, бір жеңнен қол шығара білуіміз керек, – деген облыс әкімі еліміздегі татулық пен тұрақтылықтың нығаюына елеулі үлес қосқан бірқатар азаматқа арнайы марапаттарды табыстады.

Келесі кезекте Қазақстан халқы Ассамблеясының ардагерлері сөз алып, жылы лебіздерін жеткізді.

Салтанатты шара соңы А.Тоқпанов атындағы Жамбыл облыстық қазақ және орыс драма театры әртістерінің қойылымына, этномәдени бірлестіктердің хореографиялық ансамбльдері және К.Әзірбаев атындағы облыстық филармония өнерпаздарының концерттік бағдарламасына ұласты.