БАТАЛЫ ЕЛГЕ БАҚ ҚОНАР

Тағылымы мол байқауға Тараз қаласы және барлық аудандардан жүзден жүйрік шыққан 11 үміткер қатысып, өздерінің айтып жүрген баталары, ел есіндегі белгілі тұлғалардың батасы және салт-дәстүрге қатысты бата түрлері бойынша сынға түсті. Алғашқы өз батасын беру кезеңі бойынша барлық үміткерлер жақсы өнер көрсетті. Ешкім орта жолда сүрініп қалмады. Екінші кезеңде Төле би, Бөлтірік шешен, Ғабит Мүсірепов, Сәбит Мұханов, Бауыржан Момышұлы берген баталар бойынша аталардың шеберлігі сыналды. Бұл кезеңде Төле бидің батасын керемет бере білген шулық Жайлаубек Қалиев,  Бөлтірік шешен батасын айтқан жуалылық Сейітқазы Медетбеков ерекше көзге түсті.  Батагөй қариялардың арасынан жамбылдық Орынбай Рысбаевтың, тараздық ғалым Исан Тілегеновтың, 88 жастағы құландық Тұрсынбай Елубаевтың, таластық Әділхан Тойшымановтың шешендіктеріне көрермендер дүркін-дүркін қол ұрып, қошемет көрсетіп отырды. 

Байқау барысында Мәдениет саласының үздіктері Оңал Азаматова, Ғани Мәтебаев, Мадина Сағынбекова және «Асыл аналар», «Әулиеата» ансамбльдері әннен шашу шашты. Қазылар алқасының шешімімен жеңімпаздар мен жүлдегерлер анықталды. 

Іс-шараны облыс әкімінің орынбасары Еркін Үйсімбаев қорытындылап, облыс әкімі Нұржан Нұржігітовтің батагөй ақсақалдарға жолдаған құттықтау хатын оқып берді. Сондай-ақ, Еркін Құлымбайұлы аталған байқаудың бас жүлдесін иеленген жуалылық Сейітқазы Медетбековке 400 мың теңгенің серификатын және бірінші дәрежелі дипломын табыс етіп, «Ең үздік батагөй – 2023» лентасын тақты. Бірінші жүлде Шудағы Төле бидің жайлауынан келген Жайлаубек Қалиевке бұйырды. Бірінші жүлдені «Аманат» партиясы облыстық филиалы төрағасының орынбасары Ермұханбет Жұмабек табыс етті.  Облыстық ардагерлер кеңесінің төрағасы Еркінбек Солтыбаев екінші жүлдеге ие болған тараздық Исан Тілегеновты, үшінші орынды иеленген Жамбыл ауданының қариясы Орынбай Рысбаевты дипломмен және қаржылай сыйлықпен марапаттады. Облыстық «Қоғамдық келісім» мекемесінің басшысы Мүбарак Жинақбаева арнайы жүлдені Т.Рысқұлов ауданынан қатысқан үміткер, 88 жастағы ақсақал Тұрсынбай Елубаевқа табыстады. Батагөйлердің облыстық байқауына қатысқан барлық ақсақалдарға ақшалай ынталандыру сыйлықтары және облыстық ардагерлер кеңесінің Алғыс хаттары табысталды. 

Қазіргі таңда бата бере алатын ақсақалдар азайды. Жасы үлкендердің барлығы бірдей өздерінің қоғамдағы және ұрпақ алдындағы міндеттерін сезіне бермейді. Сондықтан, мұндай бата беру байқауларын ұйымдастырудың мәні бөлек. Аталған байқаудың аудандық, ауылдық кезеңдеріне екі жүзден астам ақсақал  қатысқанын атап айтуға тиістіміз. "Бұл ән – бұрынғы әннен өзгерек..." деп Шәкәрім байқаудың жоғары деңгейде өтуіне облыстық билер кеңесінің төрағасы Оңласын Есіркепов, облыстық билер кеңесі төрағасының орынбасары Талғат Жұмабек ерекше еңбек сіңіргенін айта кеткен жөн.

Мұндай тәрбиелік мәні бар іс-шара алдағы жылдары да жалғасын табады. Байқаудың республикалық кезеңінде облысымыздың намысын жүзден жүйрік шыққан Сейітқазы Медетбеков қорғайтын болады.