АЛТЫ АРУ ОДАҚҚА МҮШЕ БОЛДЫ

"Анаға тағзым" орталығында 8 наурыз – Халықаралық әйелдер күніне орай Қазақстан Журналистер одағы Жамбыл облыстық филиалының төрағасы Жаңабай Миллионов облыстың бірқатар бұқаралық ақпарат құралдарында жұмыс істеп жүрген журналист қыз-келіншектермен кездесті.
Мерекеге орай құттықтау сөз алған Жаңабай Миллионұлы осы салада еңбек етіп жүрген нәзік жанды қаламгерлердің шығармашалық табыстарын ерекше атап өтіп, олардың қоғамдағы атқарып жатқан қызметтеріне жоғары баға берді. Арнайы ақ дастархан жайылып, еркін форматта әңгіме өрбіді.
Салтанатты жиында «Aulieata-Media» ЖШС-нің бас директоры Оралхан Дәуіт, "Jambyl" телеарнасының директоры Гүлбаршын Құланбаева, «Aulieata-Media» ЖШС-і бас директорының орынбасары Алпамыс Қазыбаев, «Анаға тағзым» орталығының директоры, танымал медиа-менеджер Эльмира Мырза-Ғали, облыстық "Знамя Труда" газетінің бас редакторы Татьяна Борисенко, жуналист Дариха Үмбетиярова, «Aq Jol» газетінің жауапты хатшысы Маржан Рақай, Шу аудандық «Шу өңірі» газеті бас редакторының орынбасары Динара Батырханова сөз сөйлеп, журналист қыз-келіншектерді алда келе жатқан мерекелерімен құттықтап, істеріне сәттілік тіледі. Облыстық "Aq Jol" газетінің бас редакторы Хамит Есаман және облыстық "AR-AI" газетінің бас редакторы, филиал басшысының орынбасары Тұрсынбек Сұлтанбеков кеш себепкерлеріне жырларын арнады.
Арулар мерекесі қарсаңында облысымыздың алты журналист қыз-келіншегі Қазақстан Журналистер одағының мүшелігіне қабылданған болатын. Салтанатты шара барасында Одақтың Жамбыл облыстық филиалының төрағасы Жаңабай Миллионов одақ қатарына қабылданған облыстық «AR-AI» газетінің тілшісі Ақтоты Жаңабайға, облыстық «Знамя труда» газетінің тілшісі Лариса Губашеваға, облыстық «Jambyl» телеарнасының редакторы Ардақ Сапибуллаға, Т.Рысқұлов ауданы әкімінің баспасөз хатшысы Мөлдір Тастанбекке, Шу аудандық «Шу өңірі» газеті бас редакторының орынбасары Динара Батырхановаға, «08.info» ақпарат агентігінің бас редакторы Дариха Үмбетияроваға Қазақстан Журналистер одағының мүшелігінің куәлігін, төсбелгісін және ескерткіш сыйлықтарды табыс етті. 
Сондай-ақ жиынға шақырылған журналист қыз-келіншектердің баршасы мерекелік сый-сияпатқа ие болды.