Ерлік – елге мұра, ұрпаққа – үлгі

7 мамыр – Отан қорғаушылар күніне байланысты Тараз қаласындағы Баласағұн орталық концерт залында құқық қорғау органдары мен күштік құрылымдардың, әскери бөлімдердің өкілдері мен ардагерлердің және қала тұрғындарының қатысуымен салтанатты жиналыс болды. 
Салтанатты шара Қазақстан Республикасының Әнұранын шырқаумен басталды.
Жиында облыс әкімінің бірінші орынбасары Нұржан Календеров  салтанатты жиналысқа қатысушыларды, әскерилерді, құқық қорғау органдарының қызметкерлерін және Қазақстан Қарулы Күштерінің ардагерлерін Ұлы Отан соғысындағы Жеңіс және Отан қорғаушылар мерекелерімен шын жүректен құттықтап, бейбіт өмірімізді көздің қарашығындай сақтап, тәуелсіздігіміз бен ел тұрақтылығының қалқаны болып тұрған Қарулы Күштер әскерлерінің қызметіне жоғары баға берді. 
Салтанатты жиналыс барысында қызметтік міндеттерін мүлтіксіз атқарып, ұзақ жылдар бойы жемісті қызмет атқарып жүрген бірқатар азаматқа "Облысқа сіңірген еңбегі үшін"  төсбелгісі, облыс әкімінің Құрмет грамотасы мен Алғыс хаты табыс етілді.  
Мерекелік салтанатты шара облыстық филормония өнерпаздарының концерттік бағдарламасына ұласты. 

"ҒҰМЫР-ДАРИЯ"–АҚПАРАТ