ҰЛТТЫҚ ДӘСТҮР ҰЛЫҚТАЛДЫ

Төле би ауылындағы Әл- Фараби мектебінің шақыруымен жақында Шу аудандық ардагерлер кеңесінің бір топ төралқа мүшелері ұстаздармен, оқушылармен кездесіп қайттық. Қызықты кездесуде ардагерлер бүлдіршіндерге қазақтың ұлттық салт – дәстүрлерін насихаттап, ескіден келе жатқан шаруашылық, тұрмыстық жәдігерлерді күнделікті өмірде қалай қолданылатынын түсіндірді. Іс-шараны оқушылар жұмбақ айтудан бастады, ал шешуін аталары тауып, олар тұрмыстық заттардың, ат әбзелдерінің, қару-жарақтың не үшін, қалай қолданатынын балаларға мұқият талдап түсіндіріп берді. Шу аудандық ардагерлер кеңесі жанынан құрылған әкелер  кеңесінің төрағасы Мейрхан ата қолына қамшыны ұстап тұрып балаларға:–    Бұл қамшы ықылым заманнан бері қазақтың қолынан түспей келеді. Мал бағушылардың қолында таяқ болған, ал адамзат атқа мінген кезден бастап, қамшы мен шылбыр пайда  болған. Уақыт өте келе қамшының түрі көбейіп, сапасы артқан. 
Қамшыны қазақ алқалы жиындарда, ұлттық құрылтайларда  сөз сұрау, сөз алу үшін ишарат құралы ретінде пайдаланған. Сол замандардан бері бізбен бірге жасасып келген ұлттық жәдігерлерді қастерлейік, әр қазақтың үйінде қамшы мен домбыра қатар ілініп тұруы керек. «Нағыз қазақ – домбыра» деген қағиданы да ұмытпаңдар, балалар! – деді.
Келесі кезекте асық атудан көрініс көрсеттік. Асық атудан облыс чемпионы, ардагер спортшы, осы жолдардың авторы шебердік сағатын өткізді. Бүлдіршіндер де атасынан қалыспады.
Кездесу барысында бүлдіршіндер де үлкендерге ілтипат көрсетіп ән салды, би биледі, мәнерлеп өлең оқыды. Осы іс – шараны ұйымдастырған мектеп директорының тәрбие ісі жөніндегі орынбасары Шолпан Төлегенованың тәжірибелі, ысылған өз ісінің маманы екеніне ақсақалдар риза болды. Бір қызығы, кездесуде ұстаздар да, оқушылар да, ардагерлер де бұрыннан таныстар секілді еркін отырып, ашық пікір алмасты.
Мектеп директоры Жанат Ұзақбайұлы Әлиасқаров қонақтарға ризашылығын білдіріп, оқушыларға ұлттық құндылықтардың маңызын, мәнін түсіндіріп бергендері үшін рахмет айтты. Шу ауданының Құрметті ардагері Әнафия Шабанбаев ақсақал бүлдіршіндерге салт – дәстүр туралы оқу құралдарын сыйға таратты. 
Жылқыбай ҚОЙШЫБЕКОВ,
Шу аудандық әкелер 
кеңесінің мүшесі