Ысырапшылдыққа тыйым болмай тұр

Соңғы жылдары тойға ғана емес, жерлеу кезінде ас беру үшін қаржы ұйымдарынан несие рәсімдеушілер туралы жиі айтыла бастады. Жаназа рәсіміндегі дастарханды жағдайы бар азаматтардың қалтасы көтергенімен, қарапайым халық үшін кәдімгідей салмақ екені рас. Көбіне-көп мәйітті аурулап, ақыреттік сапарға жолымен аттандырып салуды емес, сойыс малы, мен дастарханның жайы күйіттеп кететіні бар. Бұл жағдай қоғам тарапынан аз айтылып жатқан жоқ. Осы мәселе «Қаратау   Қажы би» мешітінде ауылдық округ имамдарының қатысуымен өткен басқосуда кеңінен талқыланды.  Жиынға мешіт имамдарынан бөлек, аудандық ардагерлер кеңесінің төрағасы Жұмабек Әсемов, аудандық билер кеңесінің төрағасы Сәулембай Әбсадықұлы, аудан әкімдігі ішкі саясат бөлімінің сектор меңгерушісі батырхан Темешбай және әлеуметтік мәселеде үн қатып жүрген белсенді азаматтар қатысты. Бір үйден жаназа  намазы оқылса, сол қазалы отбасы жетісі, бейсенбілігі, қырық күндігі, жылдық асы сынды хайыр ихан-садақа беру әдетке айналды. Бұл істер қасиетті дінімізде міндеттелмеген. Ел-жұрттан қалмайық, «ұят болмасын» немесе біреуден кем  түсейік деген сияқты ниетпен жасалса, ол істе бағыштауға тұратын ешқандай сауап болмайды. Қаралы  үйде үш күнге дейін қазан көтеруге болмайды. Мұндай тәртіп қазір Майтөбе ауылында жолға   қойылған. Сонымен  қатар, Бостандық   ауылы  қолға алып жатыр. Дастарханға қойылатын ас түрлерін бекіту керек. Соған орай талапты күшейту керек. Олай жасамасақ ысырапшылдықты тоқтата алмаймыз. Бұл туралы басқосу барысында аудандық    «Қаратау  Қажы би» мешітінің бас имамы Жалғас Жұбатхан айтып өтті. 
Сондай-ақ, марқұмның қырық күндігіне дейін таратылатын бейсенбісіне қатысты Тамды ауылы «Тәңкібай ата» мешітінің имамы     Нұрбол    Төреқұлов: - Бақилық болған адамның бейсенбісін өткізу қалтаға салмақ. Бұл өте күрделі мәселе. Халық арасында түсіндіру жұмыстарын кеңірек жүргізе білу қажет. Дұрыс насихатталса, халық келіседі. Алайда, бұл бір күнде шешілетін түйткіл емес. Сәтімен жүзеге асады. Мәселен Тамды ауылында марқұмның қонақасын беруге  шектеу қойдық. Алыстан көңіл айтып келгендер болмаса, үлкен дастархан жайып қажеті жоқ, - деді.
Ауыл    имамының сөзін қостаған Сәулембай Әбсадықұлы бейіт басында жыртыс таратуға қатысты ой бөлісті. 
- Жыртысты ақшалай тарататын жағдай да ұшырасады. Оны көңіл айтып келгендерге емес, жетім-жесірлерге үлестіргеннің сауабы әлдеқайда мол болмақ, - деді ол. 
Өз кезегінде Жалғас Жұбатхан арнайы  топ құрып, жаназа намазы оқылған үйге барып, насихат жұмысын жүргізуге, ортақ пәтуаны түсіндіруге байланысты бастама көтерді. 
Сонымен қатар, жиында Қызыләуіт ауылының имамы Қали Төсбаев, Майтөбе ауылының имамы Мұхтар Шәдіманұлы, Үшарал ауылының имамы  Қадірбек Көпбосынұлы,  Бөлтірік шешен ауылының имамы Бақытжан Нұғыманов, қандастар мәселесімен айналысып жүрген Жолдас Нұрбаев бұл бағытта атқарылып жатқан жұмыстарды баяндап, көпке ортақ түйткіл бойынша  пікір білдірді. 
Жиында Батырхан Темешбай: - Жұмыс жоспарын құру керек. Ауылдық округтердегі әкім аппаратында дін істерімен айналысатын мамандар бекітілген. Ауылдағы қариялар, ардагерлер   кеңесі, билер кеңесі бар жұмысшы тобын құрсақ. Ысырапшылдықты тию туралы үндеу қабылдап, оның мәтінін баспасөз бетіне жарияласақ халық танысар еді,-деген ұсынысын білдірді. 
Басқосу соңында жиылғандар бұл бағыттағы жұмыстарды жандандырып, тыңғылықты   жүргізу   туралы  тоқтамға келді.                                             
                                                                                       Нарбол Қашаған, Талас ауданы