Жыл қорытыланды, жастар тәрбиесі зерделенді

Өткен аптаның жұмасында "Ардагерлер орталығы" ғимаратының мәжіліс залында облыстық ардагерлер кеңесінің кезекті пленумы болып, оның жұмысына облыс әкімінің орынбасары Қанатбек Қайшыбекұлы Мәдібек, облыстық ардагерлер кеңесінің және тексеру комиссиясының мүшелері, қалалық, аудандық билер, аналар, әкелер кеңестерінің төрағалары, бірқатар облыстық басқармалардың басшылары мен жауапты қызметкерлері, бұқаралық ақпарат құралдарының өкілдері қатысты. Пленумда облыстық ардагерлер кеңесінің төрағасы Еркінбек Солтыбаев облыс ардагерлер ұйымдарының 2024 жылғы жұмысының қорытындылары туралы және облыстық ардагерлер кеңесінің төралқа мүшесі Жаңабай Миллионов "Жастар тәрбиесі - адамзаттың мәңгілік тақырыбы" деген тақырыпта баяндамалар жасады. Пленумда ұйымдастыру мәселелері қаралды. Облыстық ардагерлер кеңесінің төралқа мүшелері болып қоғам белсендісі Қасымхан Төлендиев, облыстық ардагерлер кеңесі ұйымдастыру бөлімінің басшысы Қонысбай Қуандықұлы Ильясов, облыстық ардагерлер кеңесінің мүшелері болып осы облыстық кеңестің есепші - бас маманы Байқадам Жуасбеков, облыс әкімі аппараты жанындағы бастауыш ардагерлер ұйымының төрағасы Рахметілдә Рахманбердиев сайланды. 
Сондай-ақ, пленумда облыстық ардагерлер кеңесінің басшылық құрамында бірқатар ауыс-түйіс болды. Бұған дейін облыстық ардагерлер кеңесі төрағасының орынбасары қызметін атқарып келген Шәріп Дәулетбаев өзінің өтініші бойынша денсаулық жағдайына байланысты жұмысынан босатылды. Облыстық ардагерлер кеңесі төрағасының орынбасары болып облыстық "Ғұмыр-Дария" газетінің директоры - бас редакторы Жаңабай Миллионов, облыстық ардагерлер кеңесінің жауапты хатшысы қызметіне Қонысбай Ильясов сайланды. 
(Пленум туралы толық есепті газетіміздің 2,3 беттерінен оқи аласыздар)