СЕКСЕН АЛТЫ, 16 ЖЕЛТОҚСАН...

30 январь 2024, Вторник

117

Тәуелсіздік - арманы еді бабамның,
(Есімде әлі, жыртылғаны жағамның.)
Сексен алты, он алтыншы желтоқсан,
Бостандыққа бастауы алғаш қадамның !

Қалың қазақ көтеріле бастады,
Жастарымыз сабақтарын тастады.
Бүгінгі күн, он алтыншы желтоқсан,
Болашақтың, жаңа күннің бастауы !

Зиялы жұрт шықты орталық алаңға,
Жаңалықтар тарап жатты ғаламға.
Елім деген, еңіреген ерлерге,
Болмады оңай, оқ атылды табанда.

Мәскеу жақтан қатал бұйрық берілді,
Жиылған жұрт лажсыздан шегінді.
Қыз - жігіттер ойда жоқта оққа ұшты,
Бейбіт күнде қара жерге көмілді.

Билік бәрін, деп ойлады, жайраттым,
Қателесті, өте таяз ойлап тым.
Жерлесіміз, Қаһарманы Халықтың,
Бар екенін, білмеді олар Қайраттың !

Мерт болды көп елім деген арысым,
Білерсіздер, осы айтқанның бәрі шын.
Қайрат сынды Батыры бар қазағым,
Бірақ, бірақ, таптатпады намысын.

Тәуелсіздік бізге оңай келмеді,
Ер қазағым тағы да бір ерледі.
Бостандықтың символы ғой Көк Туым
Ілулі әне, тұрған қазір төрдегі!