Талас даласындағы табиғат пен мәдениеттің тоғысы

04 май 2025, Воскресенье

«Қызғалдақ мұра – 2025» фестивалі: Талас даласындағы табиғат пен мәдениеттің тоғысыЖамбыл облысының Талас ауданы, қызғалдақтың отаны ретінде танымал, бүгін «Қызғалдақ мұра – 2025» халықаралық фестивалі жоғары деңгейде ұйымдастырылды. Бұл шара табиғаттың сұлулығы мен ұлттық мұраны біріктіріп, қатысушыларға ұмытылмас әсер сыйлады.
Жамбыл облысында қызғалдақтың 35 түрі өседі, оның 12-сі Қазақстанның Қызыл кітабына енгізілген. Қаратау тауының сілемдерінде, теңіз деңгейінен 1100 метр биіктікте орналасқан бұл өңірде Грейг қызғалдағы сияқты сирек кездесетін түрлер кездеседі. Бұл гүлдер тек осы аймақта өсетіндіктен, оларды сақтау ерекше маңызды болып табылады.

Фестиваль аясында ұлттық ойындар, салт-дәстүрлер мен қолөнер бұйымдары көрмесі ұйымдастырылды. Қатысушылар қазақтың бай мәдениетімен танысып, ұлттық тағамдардан дәм татты.

Бұл шаралар шетелдік туристердің ерекше қызығушылығын тудырды.Тамашалаған дүйім қауымның естен кетпес әсер алғанына күмәнім жоқ. Отбасымызбен бұл сұлулықтың куәсіне айналғанымызды мақтана айта жүреріміз сөзсіз. Қазақ даласының ерекшелігін айтып жеткізе алмаймыз -ау біз, сірә…