Еске алу кеші

Бүгін Тараздағы Ш.Уәлиханов атындағы Жамбыл облыстық әмбебап ғылыми кітапханасында Мемлекет және қоғам қайраткері Әлмұқан Абдрахманұлы Исақтың  85 жылдығына байланысты  еске алу кеші өтті.                   

Жиынды кіріспе сөзімен бастаған облыстық ардагерлер кеңесінің төрағасы Еркінбек Солтыбаев: «Замандас, әріптес, сыйлас, қимас, дос-жаран болған жандардың қатарлары тағдырдың жазуымен сирей бастағанда өткен күндеріңді сағынышпен жиі-жиі еске аласың.  Сондай азаматтардың бірі де бірегейі өзгеше болмыс-бітімімен, тектілігімен, адамгершілігімен елінің шексіз құрметіне ие болған Әлмұқан Әбдірахманұлы Исақ болатын. Олай болса өмірден көргені көп, түйгені мол, жас ұрпақтың қамын жеп, намысын жыртып, ұлтын ерекше сүюдің үлгісі болған мемлекет және қоғам қайраткері Әлмұқан Әбдірахманұлы Исақтың туғанына 85 жыл толуына орай «Боямасыз болмыс» тақырыбында еске алу кешін ұйымдастырып отырған Ш.Уәлиханов атындағы облыстық кітапхананың ұжымына рахметін айтып, мемлекет және қоғам қайраткері, саясаттанушы, жазушы, журналист, облысымызда ерекше қадірге ие болған қазақтың қайсар ұлы Әлмұқан Исақ туралы естелігімен бөлісті. 

 Әлмұқан Әбдірахманұлы  Исақ 1940 жылы 10 сәуірде Жамбыл облысының Меркі ауданы Сұрат ауылында туған.  Қазақ Мемлекеттік университетінің филология факультетін үздік –Лениндік стипендиат болып аяқтап, Гранитогорскідегі мектеп – интернатта мұғалім болып еңбек жолын бастаған. Көп ұзамай озат, белсенді 26 жастағы Әлмұқанды Меркі аудандық партия комитетінің нұсқаушысы жауапты қызметіне тағайындайды. Кейін бөлім меңгерушісі, аудандық атқару комитеті төрағасының орынбасары, аупарткомның екінші хатшысы, Красногор, Луговой аудандарының бірінші, облыстық партия комитетінің екінші хатшысы болып сайланады.  Еліміз Тәуелсіздік алған жылдары облыстық партия комитетінің бірінші хатшысы болған, еліміздің тұлғалы қайрат¬кері Өмірбек Байгелді мен Әлмұқан Исақтың бір жеңнен қол, бір жағадан бас шығара бірлесіп қызмет етуі Жамбыл өңірінің жан-жақты гүлденуіне, тыңнан түрленуіне айрықша серпін бергенін айтуымыз керек. Қандай қызметтің тұтқасын ұстаса да жеке басының қамын ойлап дәмегөй, бақай есеппен жұмыс істеу Әлмұқанға жат қылық. Қатарынан екі рет, 1991 және 1999 жылдары президенттік сайлауларда Елбасының сенімді өкілі болып, облыстағы сайлауалды штабын басқаруы оның халық арасындағы беделін, азаматтығын, Мемлекет басшысына деген ақ адал ниетін бағалағандық еді.”

Сондай-ақ, өз ыстық естеліктерімен Парламент Мәжілісінің 3-ші,4-ші шақырылымының депутаты, Халықаралық, қауіпсіздік және қорғаныс комитетінің төрағасы, партия фракциясының жетекшісі болған Әмзебек Рысбекұлы Жолшыбеков, облыстық ардагерлер кеңесінің төралқа мүшесі Қасымхан Төлендиев,  Қазақстан Жазушылар және Журналисттер Одағының мүшесі, белгілі қаламгер, сатирик Бақытжан Советұлы, Облыстық ардагерлер кеңесінің мүшесі Рахишева Нильзия Алгазықызы, облыстық ардагерлер кеңесінің мүшесі Үртай Сапақова , айрықша тәуекелді сарбаздар ардагері Сейтхан Қуантаев және облыстың Құрметті ардагері Қайрат Шотпақов бөлісіп, бар ғұмырын еліне қызмет етуге арнаған, оның ішінде қасиетті Әулиеата өңірінің идеологиялық саясаты сандығының кілтін ұзақ жылдар қолында ұстаған, тазаның тұнығындай болған Әлмұқан Әбдірахманұлы 71 жыл жасаған өмірінің қызметке арналған 47 жылында ақиқатқа жүгініп, әділеттіліктен аттамай еңбек еткені туралы баяндады.  

Әлмұқан Әбдірахманұлы өз заманының нағыз «идеология майданының» алдыңғы саптағы көсемі де, төгілте сөйлейтін шешені де бола білді. Еңбекпен есейген, білімділігімен биік белестерді бағындырған, кеудесіне «Құрмет» орденін жарқырата таққан, «Жамбыл облысының Құрметті азаматы» атағына да ие болған.

Әлмұқан Әбдірахманұлы еңбек жолында өзінің орнықты ісімен, тиянақытылығымен, озық ойымен, шындықтың бетіне тура қарап, жоғарыға жалтақтамай, пікірін ашық айта алатын турашылдығымен айрықшаланатын.

Шын мәнінде Әлмұқан Әбдірахманұлы Исақ – қай қызметте болмасын өзін білгір басшы, іскер ұйымдастырушы ретінде көрсете білген қайраткер.  Жамбыл телеарнасының басшылығына тағайындалған жылдары ұлттық құндылықтарымызды дәріптеуге үлкен мән берілді. Тарихымыздың қатпарлы беттерін ашып, оны насихаттау бағытында талай тартымды дүниелер көрерменге ұсынылды. Ол ағамыз дарынды жастарға қамқорлық жасады. Шығармашылық ізденістеріне бағыт-бағдар беріп отырды. Әлемі бөлек Әлмұқан Исақ ұзақ жылдар басшылық қызметінде өмірдің қия беткейін де, күн шуағын да, бұрқасыны мен даңғыл жолын да көп көрді. Бір ғажабы, қандай биік лауазымда болмасын, әрдайым өзінің адами таза қалпын сақтай білді. Осындайда ұлт ұстазы болған ұлы Абайдың «Ақырын жүріп, анық бас, еңбегің кетпес далаға» деген терең тағылымды сөздері есімізге түседі.

Өмір және қызметтік жолдарын қағазға түсіре білген, қолынан қаламы түспеген жан. Оның «Өткен күнде белгі бар», «Өтпелінің өкпек желі», «Өмірдің тағылымды мезеттері», «Үрдіс пен үдеріс», «Боямасыз болмыс» атты әңгімелер мен повестер жинақтары және көптеген публицистикалық шығармалары жарық көрген. Сондай-ақ, ол – Ұлы Отан соғысындағы Жеңістің 60 және 65 жылдық мерекелеріне орай шығарылған облыстық «Зерде» және «Ерлер есімі – ел есінде» атты бағасы биік естелік жинақ кітаптарын шығаруға үлкен еңбек сіңірген тұлға.

             Әлмұқан ағаның бір ерлік азаматтығын айтпай кетпеске болмайды. Ол туралы Жандар Кәрібаев пен Сағынхан Әмреқұлов ағалардың естеліктерінде бар.

«Обкомның бірінші хатшысының бұрыштамасымен бөлімге 1986 жылғы «Желтоқсан» көтерілісі бойынша жастарға шара қолдануға ұсыныс дайындау үшін түрлі себептермен көтеріліс күндері алаң¬да болған 89 адамның тізімі келіп түсті, 89 тағдыр тәлкекке ұшыраға¬лы тұр. Әлекеңе кіріп едім: “Не істейтін ойыңыз бар?” – деп сұрады. Мен: “Ең дұрысы темір жәшіктегі көп қағаздың арасына көміп тастау”, – дедім. Әлекең: “Дұрыс, екеуміздің тағдырымыз осыншама азаматтардың тағдырынан әулие емес. Не болса да мойынмен көтерерміз”, – деді. Бұл адалдықты аялаған ұлтжанды адамның шешімі еді. 

Әлмұқан Исақ қай кезде де Президентті қолдауы арқылы өз елінің келешегі үшін үлес қосу ұстанымынан еш тайған емес. 1999 жылы наурыз айында “Отан” партиясын құруға қатысты,  “Отан” партиясы Саяси кеңесінің мүшелігіне сайланып, 2002-2006 жылдары партияның Жамбыл облыстық филиалының төрағасы, кейіннен төрағалық облыс әкіміне ауысқанда оның бірінші орынбасары болып қызмет атқарды.  Өмірбек Байгелді облыс әкімі болғанда Әлмұқан Исақ бірінші орынбасары болды.

... Университетте бір курста оқып тағдыр қосқан жары Гүлдірайхан шаңырақтың сәнін келтіріп, отбасына мейірін тосып, ақылын қосып, асықтай ұлдарын ұяға, ақықтай қыздарын қияға қондырып, немерелерін аялап, екеуі жұптарын жазбай бақытты ғұмыр кешіп келеді. “Жары жақсының – бәрі жақсы” деген осы. Елге елеулі, перзенттік парызын алға қойған азаматтық мақсатымен тынымсыз, тыңғылықты өріп, парасат биігінде тұрған Жамбыл облысының құрметті азаматы Әлмұқан Әбдірахманұлы Исақ туралы айтпағым осы еді,» - деп еске алған 2010 жылы «Егемен Қазақстан» газетіне шыққан Жандар КӘРІБАЙҰЛЫНЫҢ «Мақсатпен өрілген парыз» атты мақаласында. 

Әлмұқан ағамыздың отбасы бұрыннан елге үлгілі, өнегелі және бақытты отбасы еді. Бүгінде ұлы Болат еліміздің бес өңірінде абыроймен мемлекеттік қызмет атқарып қазір Ақордада жауапты қызметте.  Әкесінің адал жолын жалғастыруда. 

Әулиеаталықтар ардақты ұлы - Әлмұқан Әбдірахманұлы Исақты ұмытпайды, рухына тағзым етеді.