ЕРЕЖЕПТІ ЕСКЕ АЛДЫ

Жамбыл ауданындағы Айнакөл ауылында (қазір Өрнек) дүниеге келіп, сондағы Крупская атындағы орта мектепті бітірген Ережеп Сауқатов Кеңес әскері құрамында Ауғанстандағы соғысқа қатысып, отбасындағы алған отаншылдық тәрбиесімен азаматтық борышын да адал өтеді.Әскери бұйрыққа адал болған Ережеп жан алысып, жан беріскен шайқастардың бірінде ерлікпен қаза тапты. Ерлігі жоғары әскери марапат – «Қызыл Жұлдыз» орденімен аталып өтті. Ол сонда небәрі 20 жастағы боздақ екен-ау! Тірі болғанда биыл 60 жасқа толар еді.
Жуырда Өрнек ауылында қазақ күресінен ауылдық округ ардагерлер кеңесінің мұрындық болуымен, ауылдың белсенді ақсақалдары мен қарияларының, ілкімді азаматтардың қолдауымен Ауған соғысында ерлікпен қаза тапқан Ережеп Сауқатовты еске алуға арналған турнир өтті.
Өрнек ауылдық округінің әкімі Өмірбек Ботаев кіріспе сөз сөйлеген жарыстың салтанатты ашылуына батырдың туған ағасы Тастемір Бижігітұлы, ауылдық округ ардагерлер кеңесінің төрағасы Лесбек Амалов, билер кеңесінің төрағасы Қаржаубай Қосаров, еңбек ардагері Фатима Алтынбекова ауған соғысының құрбаны Ережеп Сауқатовтың балалық кезеңі, жасөспірім шағынан естеліктер айтты. Ал, Ауған соғысы ардагерлері Жамбыл аудандық ұйымының жетекшісі Керім Ізбасаров отаншылдық, ерлік, болашаққа қызмет ету жөнінде артында өшпес із қалдырған жерлес жауынгердің есімі ұмытылмайтынын тілге тиек етті. 
2010-2013 жылдары туған балалар белдескен бұл бәсекеге Ерназар, Тоғызтарау, Аса, Пионер, Қаракемер ауылдарынан және Тараз қаласынан да жас балуандар қатысты. Белдесуде 2010-2011 жылдары туған балалар 2 салмақ дәрежесінде, 2012-2013 жылдары туған балалар 4 салмақ дәрежесінде сынға түсті. Әр салмақ дәрежесі бойынша жеңімпаз болғандар мен 2-3 орын алғандарға арнайы медальдар, дипломдар мен атаулы сыйлықтар берілді. Жеңіске деген жігерлілік танытқан балуандар да құр қалған жоқ.  Оларға ынталандыру сыйлықтары табысталды.
Ал, түйе балуандар сайысында өрнектік өрендер өзгеше ойын өрнегімен көзге түсті. Әлімжан Сағаділда, Динар Абдуллин және Бағлан Еркебұлан жүлделі орындарды бөлісті.
Жарысқа Ережеп батырдың бауырлары, ағайындары, достары демеушілік жасады.
Артынан марқұмның әруағына арналып ас беріліп, құран-дұға бағышталды.
Балтабай АХМЕТОВ,
Өрнек ауылдық ардагерлер кеңесінің төралқа мүшесі.
Жамбыл ауданы