БАҒЫТЫМЫЗ – ЖАҢҒЫРУҒА НЕГІЗДЕЛГЕН ӨРЛЕУ ЖОЛЫ

Біз 2026 жылдың наурыз айында еліміз бойынша өткізілген жалпыхалықтық референдумда мемлекет болашағы үшін жарқын таңдау жасадық. Қазақстан халқы жаңарған Конституция жобасын қолдап, өз дауысын берді. Ол үшін саналы түрде, кең көлемде ой зерделеп, нақты шешім жасадық. Себебі, жаңа Конституция еліміздің дамуы үшін қажеттігіне, осы басты құжат еліміздің  әр тұрғынының мүддесін қорғайтынына көзіміз  әбден жетті. Конституциямыздың 35-бабында: «Қазақстан Республикасы азаматтарының тікелей және өз өкілдері арқылы мемлекет ісін басқаруға қатысуға, мемлекеттік органдар мен жергілікті өзін-өзі басқару органдарына өзі жүгінуге, сондай-ақ, жеке және ұжымдық өтініш жолдауға құқығы бар. Қазақстан Республикасы азаматтарының мемлекеттік органдар мен жергілікті өзін-өзі басқару органдарын сайлауға және оларға сайлануға, сондай-ақ, жалпыхалықтық референдумға қатысуға құқығы бар. Жалпыхалықтық референдум өткізу тәртібі конституциялық заңда айқындалады. Қазақстан Республикасы азаматтарының мемлекеттік қызметке кіруге тең құқығы бар. Мемлекеттік қызметші лауазымына кандидатқа қойылатын талаптар заңға сәйкес лауазымдық міндетінің сипатына ғана қатысты болады» деп айқын   көрсетілген. Жаңа Конситуцияда артық сөйлем, артық шешім жоқ. Баршасы еліміздің дамуына ықпал етуге арналған. Еліміздің  әр тұрғынының мүддесін қорғауға бағытталған.  Қазақстан Республикасы Құрылтайының құралатыны да жаңа Конституцияда айқын   көрсетілген. Құрылтайдың мәртебесі, міндеті, атқаратын жұмыстары нақты белгіленген. Сондықтан, бұл бағыттағы жұмыстардың барлығын еліміздің даму жолына жасалған қадамдар деп есептеймін.  Құрылтай – қазақ халқы үшін бүгін ғана қолданысқа енгізілген сөз емес. Еліміздің тарихында Құрылтай жиындары болған. Бұл кешегі бабаларымыз жасаған жолдың лайықты жалғасы.  Құрылтайда 145 депутат болады деп нақты белгіленген. Олар Құрылтай депуататтарын сайлау науқанында бақ сынайтын бірнеше ірі партиялардың арасындағы бәсекенің барысында партиялық тізіммен жасақталады. Қазіргі таңда 7 саяси партия өз үміткерлерінің тізімін жариялап, оларға сенім артып отыр.  Партиялардың бұлай ашық бәсекеге түсуі – еліміздегі демократияның көрінісі. Қай партияны қолдаса да, халықтың   таңдауы. Сайлаушыларға ерік пен мүмкіндік берілген. Әділдік жолы осы. Халық қай партияны көбірек қолдап, дауысын молырақ береді – ол да бақылаушылардың көз алдында. Халық басым дауысымен қолдаған партиялардың бағы жанады. Яғни, халықтың көп мөлшерде қолдауы деген – сол партияның Құрылтайдағы саяси беделі мен орнына, салмағына тікелей әсер етеді.  Сондықтан, қазіргі таңда еліміз бойынша 7 партия өңірлерді аралап, өздерінің үгіт-насихат жұмыстарын жүргізіп жатыр. Олардың алдағы жұмыстарының қалай сәтті жалғасатыны да – осы үгіт-насихат жұмыстарының нәтижесіне тікелей байланысты. Партиялардың қайсысы болмасын артта қалғысы келмейді. Әр партия халықтың   сенімінен шығу үшін алға қадам басады. Бәрінің де өз жоспарлары, болашаққа жасаған айқын бағдарламалары бар. Бәрі де өздерінің іс- әрекеттеріне сенімді. Бұл жерде  әр партияның белсенді жұмыс жүргізе алуы маңызды.  Сондықтан, Құрылтай депутаттарын сайлау науқанында ешқандай саяси партияға аянып, бөгеліп қалуға болмайды. Нақты не атқара аласың, қандай жоспарың бар, баршасын көрсетіп, әр партия өзінің мүмкіндігін дәлелдеп шыға алуы тиіс. Тұрғындар түптің түбінде дұрыс таңдау жасап, жолы айқын, жоспары мығым, бағыты бағдарлы  партияларға дауыс беретіні шындық. Себебі, өзін сайлауалды үгіт-насихат   кезінде дәлелдей алған партия одан  әрі қарай да өздерін айқын жолда көрсетіп, нақты қадамдар жасай алады. Мен  – ұзақ жыл кітапхана саласында еңбек еткен, көптің рухани байлыққа кенелуіне қызмет атқарып  келе жатқан адаммын. Рухани байлыққа ұмтылған адамдар өз мақсаттарын айқын бағамдайды, алдарына нақты межелер қоя алады, шынайы шешім қбылдай алады. Бұл – кітап оқудың құдіреті. Ең бастысы айналаға сергек қарай  алады. Саяси науқан  кезінде де өз таңдауын жаңылыспай тауып, дұрыс жолды аса қиналмай   табады. Дұрыс жол – ел дамуына арналған жол. Осы жолды адаспай табу  – сайлаушылардың таңдауы. Осынау бәсекеде жоспары айқын, жолы даңғыл, мақсаты мығым партияларға жеңіс тілеймін. Өзім де еліміздің дамуы жолында мақсаты биік, жолы айқын азаматтардың жеңіске жетуіне ықпал етпекшімін. Себебі, мемлекет таңдауды халыққа берді. Бұл таңдауда халық қателеспей, нақты даму жолын таңдауы тиіс. Ол – жарқын болашаққа, шындыққа, жаңашылдық пен жаңаруға, дара бастамаларға негізделген өрлеу жолы.  Ғалия ШУБАЕВА, аудандық ардагерлер кеңесі төрағасының орынбасары, аудандық  мәслихаттың депутаты. Мойынқұм ауданы